Riesenrad auf der Annaberger KÄT

De Annebarger Kaat – von Manfred Pollmer

Is Pfingsten wieder mol vürbei
Un zieht bei uns der Sommer ei,
do frat sich klaa, do frat sich gruß:
in Annebarg, do is wos lus.
Drüm mahrt net lang un kommt när rauf
Un macht emol an Pöhlbarg nauf!
Doß ihr mir ober ze dan Fast
de Galdbersch net vergaßt!
:
Nu guckt eich dos Gewärch när a
un rammelt an de Leit net na!
Is dos ne Lust, is dos e Treibn!
Do könnt mer togelang traten bleibn!
Ne Tut zen Blosen kriegt der Gung,
de Mad enn bunten Luftballon;
do werd emol gerazt dreinei,
wenn’s aah bluß Nieten sei.
:
Nu horcht när mol of dar Musik,
und dos Gekauks und dos Gequiek!
Un fahrt ihr mit der Geisterbah,
do halt eich anenanner a!
Un Reitschuln, die gibt’s haufenweis,
un Brotwurscht aah un Stangeleis,
un waar huchnauf Courage hot,
setzt sich in Riesenrod.
:
Un regnt´s eich, wos es regne ka,
do stießt bei uns kaa Mensch sich dra.
Zer Kaat, ihr Leit, dos muß su sei,
do waacht’s meitog schu alles ei.
Do spanne mir ne Regnscherm auf
un suhln erscht racht zen Kaatplatz nauf!
De Hauptsach is, zen Feierwark
blebt’s treten in Annebarg!
:
Refrain:
De Kaat, ihr Leit, de Kaat is schie,
die derft net bluß ne Woch lang gieh.
De Kaat, ihr Leit, iech bleib derbei,
die müßt es ganze Gahr lang sei!
:

Manfred Pollmer (* 10. November 1922 in Geyer; † 23. November 2000) war ein Mundartdichter und Heimatforscher des sächsischen Erzgebirges. …
(vertont von Roland Sonntag, Neudorf)
erschienen in der Erzgebirgs Rundschau – Kätzeitung 2001

Annaberger-Kät-Lied

“Annaberger-Kät-Lied” von Anna Wechsler

In Arzgebärg weit ime dim bis nei in Böhmerland,
do is de Anneberger “Kat” vu altersher bekannt.
E Volksfast, wie’s kah gressersch gibt,
dos is de “Kat” bestimmt,
un wie’e Wallfahrt nimmt siechs aus,
wenn’s Volk gezuung kimmt.
:
Ja! Wenn de Maibaam blühn,
is Annebarger “Kat”, do freet siech Alt, do freet sich Gung,
free’n Bossen siech un Maad!
Worüm? Das wissen se salberscht net,
dr alte Zimmt geds Gahr, ’sis ner, daß mr de Pfeng lus werd
un in Gewarg miet war!
:
Erschienen in der Erzgebirgs Rundschau – Kätzeitung 2000