De Annebarger Kaat is ewos für’sch gunge Volk, un dos war meitog esu. Aah für miech als gunge Karl konnt’s nischt Schennersch gaabn. Wos hatten mir Bossen salling für Frahd un für Lust an dan Teebes of der Kaat! Dos es in dan verwerrten Gewürg un in dan Musikspekta-kel zwischennei daar Aß- un Raatsbuden, daar Reitschuln, Riesenräder, Achter- un Geisterbahne, e wing daamisch laut zugieht, doß mer es eigene Wort nimmer verstiehe ka, un doß mer in dan Gerammei aah emol miet agerunkst werd – dos muß sei, da dos gehört zur Kaat miet derzu, un dos macht se gerood erseht richtig schie!
:
Miet derzu gehört emende aah, doß sich daar oder gaaner Bundaus von gunge Kaatgieher emol richtig austut un doß er mit de Maad e wing rümschaakert. Es werd heit net annersch sei, wie’s bei uns in unnere gunge Gahr gewaasen is! Freilich, e Haufen Gald hatten mir domols net in dr lasch. Mir hobn uns aabn sal-berscht e wing Spaß gemacht; Olbernhäten, die nischt gekost’ un die aah kaann Menschen wiehgeta hobn, die ober dos Kaat-Laabn erseht zur rächten Frahd macheten. Dodra hob iech denken müssen, wie iech in vüring Gahr mit meiner Fraa wieder emol über dr Kaat gange bie.
:
Waßderhule, iech muß heit noch grodnauslachen, wenn iech dra denk, wos mir verzngahring Lausknicker salling emol of der Kaat lusgelossen hobn. Mir siebn, acht Bossen, sei mittend-rinne in allergrößten Gewürg traatengebliebn. Aaner, e langer Lulatsch von balzwee Meter Hoch, hot gahling nauf in der Luft gezeigt. Noochert hot’r wie agestochen geschriern: „Inu du Ugelück! Itze kimmt er! Gerod of uns zu…! Mir annern hobn aah miet zengstnauf zum Himmel geguckt un e Gesicht gemacht, wie de Kuh, wenn’s donnert. Es dauret gar net lang, un de erschien Sperrguschen üme-dim sei aah tratengebliebn un hobn neigieret miet naufzu ge-sah, von wu doch überhaupt nischt runnerkomme is, un e Fünkel spöter hot de halbe An-naberger Kaat dogestanden, sich de Aagn aus ne Kopp geguckt un Löcher nei ne Himmel gebohrt, wu außer dicke schwarze Regnwolken (zur Annebarger Kat gehört der Regn wie e Filzschuh zun annern) nischt zu derblicken gewaasen is, net emol e ausgerissener Luftballon.
:
Mir ober, mir Lausgunge, mir hobn’s mit unnern todernsten Gesicht, wos mir hobn machen müssen, net lang ausgehalten. Mir sei noochert ausennanerge-f atzt wie der Blitz un nüber zur Fasthall gerannt. Dort hobn mir uns wieder z’ammgefunden un uns ins Fäustel gelacht un ne Bauch gehalten vür Lachen, weil’s esu schie geklappt hatt. Von weitem ober hobn mir es Spuken von de Leit gehört, die uns gedroht hobn, weil se’s mittlerweile weiskriegt hatten, doß se när verolbert wurn warn. Ja, esu is dos gewaasen, un iech hob’s meiner Fraa derzöhlt un doderbei nochemol su laut gelacht, doß sich de Leit nooch uns umgedreht hobn. „Wog dir ja net!”, hot mei Fraa noochert ge-wattert, wie iech zu ihr sät: „Waßt de, iech hätt kaa geringes Gelüstel, emol auszeprobiern, ob ene sette Sach aah heitzetoog noch klappen tat…!”
:
Manfred Pollmer
:
Erschienen in der Erzgebirgs Rundschau – Kätzeitung 2000